Նորածին երեխաների սնուցումը

Առողջ նորածին երեխաներին (ըստ Ապգարի սանդղակի 8-10 նիշ գնահատականով) հակացուցումների բացակայության դեպքում, անհրաժեշտ է կրծքով կերակրել ծնվելուց 6-12 ժամ հետո` անկախ կաթի առկայությունից։ Կրծքով վաղ կերակրելը ուժեղ գրգռիչ է կաթի ավելի շուտ արտադրության համար, նպաստում է արտաքին միջավայրի պայմաններին նորածինների լավ հարմարվելուն։

Հասուն առողջ նորածինների համար սահմանվում է սնուցման ռեժիմ՝ օրվա ընթացքում 6 կերակրում, 3,5 ժամյա ցերեկային և 6,5 ժամյա գիշերային ընդմիջումներով։ Թույլ ծծոդ և մարմնի փոքր զանգվածով երեխաներին նշանակվում է օրվա ընթացքում 7 կերակրում՝ 3 ժամյա ընդմիջումով։

Կյանքի առաջին 7-8 օրերին երեխայի սննդի օրաբաժինը հաշվում են Ա.Ֆ. Տուրի բանաձևով. 70-ը կամ 80֊ը բազմապատկում են ո-ով, որտեղ՝ ո-ը նորածնի կյանքի օրերն են (70 գործակիցը կիրառվում է այն երեխաների նկատմամբ, ովքեր ծնվել են 3200 գ-ից պակաս զանգվածով, 80-ը՝ 3200 գ և ավելի զանգվածով), կամ Գ.Ի. Զայցևայի բանաձևով, ծնվելու պահին մարմնի զանգվածի 2%-ը բազմապատկվում է ո-ով (n-ը նորածնի կյանքի օրերն են)։ Նորածնի կյանքի տասներորդ օրը նրա ստացած կաթի քանակությունը հասնում է 20% ֊ի (2% x 10) կամ` ծնվելու պահին մարմնի զանգվածի 1/5-ին, և այդքան էլ մնում է նորածնային շրջանի ողջ ընթացքում։

Յուրաքանչյուր կերակրման ժամանակ երեխային պետք է տալ միայն մեկ կուրծքը, ուշադրություն դարձնելով, որ կուրծքը լրիվ դատարկվի։ Եթե մնում է մնացորդային կաթ, այն պարտադիր պետք է կթելով դատարկել։ Կերակրման տևողությունը 20-30 րոպեից չպետք է անցնի։ Եթե երեխան այդ ընթացքում կաթ քիչ է ծծում (ինչը որոշվում է կերակրումից առաջ և հետո կշռելով), ապա անհրաժեշտ է մնացորդային կաթը կթել և երեխային մինչև վերջ կերակրել գդալով։ Եթե երեխայի կյանքի առաջին շաբաթվա վերջում պարզվում է, որ մոր կաթը քիչ է, ապա անհրաժեշտ է օգտագործել դոնորական կաթ, ցանկալի է՝ չեռացրած վիճակում կաթի հականեխիչ հավաքման և սառը պայմաններում ոչ երկարատև պահելու դեպքում։

Որոշակի դժվարություններ են ծագում երկվորյակներին կերակրելիս։ Երեխաներին կուրծք են տալիս հերթականությամբ։ Նախ կերակրում են ավելի անհանգիստ երեխային։ Երկրորդ երեխային սկզբում պետք է կերակրել նույն կրծքով՝ վերջինս լրիվ դատարկելու համար, իսկ հետո՝ մոտեցնել մյուս կրծքին։ Հաջորդ կերակրումը հարկավոր է սկսել այն կրծքից, որից կերակրել էին երկրորդ երեխային։ Սովորաբար երկվորյակներին կերակրելիս մոր կաթը չի բավարարում, և երեխաները կարիք են զգում լրացուցիչ դոնորական կաթի կամ կաթնախառնուրդների (հարմարեցված)։ Պետք է հաշվի առնել, որ ավելի թույլ երեխան կարիք է զգում կրծքի կաթի ավելի մեծ քանակության։

Հարցեր, պատասխաններ, մեկնաբանություններ